Natal di Meja Makang Kasiang

Beta deng natal

parsis kaki deng capatu

kalu kacil, jang paksa nanti kaki balas

labe bae gulung kaki calana,

pake kabaya itang la pi gareja kajadiang

kalu ukur seng pas,

isi kaeng panggal di ujong

biar bisa stand di muka pintu gareja pas abis kebaktian

maar jang tingkai kalu pake baju merah yaya

deng calana mati kancing di atas pusa

jang bajalang muka tarangka

tagal bibir merah yaya deng bada su pele bijirawat

labe bae pandangan lurus ke depan dan rata-rata aer

biar hidop bisa dame deng samua

la pegang tangang deng hati pono cinta

tar jalus par basudara sandiri

Beta deng Natal

sama deng sempe deng aru-aru

ale bisa isi sagumantah

biar su lomi alus

maar kalu seng ada aru-aru, ale seng bisa dayong

ale bisa sirang aer panas,

maar kalu seng ada aru-aru, papeda dudu putih panggal

pake aru-aru biar ale bisa dayong bagus

tambah aer panas sadiki par sadiki

lalu putar sampe papeda jarning sadiki batali

cabu aru-aru

tanang gata-gata lalu angka ka atas meja makang

Beta deng natal

parsis meja deng tampa garang

jang bicara hidop sudara

kalu sabale ale seng isap sampe abis kuah tomi-tomi

jang stori laeng sayang laeng

kalu makang seng dudu di bangko panjang kuliling meja makang kasiang

jang balaga kata ale su jadi orang

kalu lupa colo jare dalang tampa garang kaca

jang sombong ale pung banya pengalaman deng su jadi orang pande

kalu tar pernah raci cili dalang colo-colo ikang make karing

ale boleh stori basar deng topu dada

maar jang lupa, kuah paku-paku santang yang biking ale otak tabuka

kalu labe, mama tumis pate campor kangkong deng ikang asar rabe-rabe

Beta deng natal

parsis ana dalang mama pung pangko

kalu panas tagal balari kuliling negeri

ciong karingat di kabaya panas turung deng tempo

parsis jam makang

cuma mau mama kas’ sua

papeda sabale deng kuah ikang asang balimbing

balaga manja la makang tar mau isap

minta mama gunting deng jare la kas’ sua

makang deng rasa mama karingat di jare

itu yang biking saki lari par setang

biar bisa turung tampa

lalu dudu kumbali deng basudara di meja makang kasiang

dengar papa pung pasang

deng lia mama aer mata balandong tagal sumbayang dalang  hati:

‘Dangke Tete Manis,

su jaga beta anana sampe dong samua su basar

deng ada yang su jadi orang’

[eltom, 25/12-2014]

 [dibaca dalam Ibadah Natal, 25 Desember 2014

Di Gereja Pancaran Anugerah, Jemaat GPM Rumahtiga]