HARI KAJADIANG

Basudara Tuang Hati Jantong!

Pagi ini ujang taru bagus lai ale. Mar Acim nih ada hati balisah tagal ciong bobou orang bakar kukis. Acim pung dalang hati, tar salah lai, ini bluder sageru nih jua. Acim kaluar dari dapor, langsung skrek, asap kaluar dari Sibu pung dinding gaba-gaba di dapor. Ini akang bobou nih pasti dari sana sudah. Tar salah lai.

Acim : Ola ee……tadi malang laki pukul sampe pagi kapa???

[Parsis dengar bagitu, Sander, Ola pung ade laki-laki yang tinggal di sablah Sibu rumah langsung lari kaluar rembeng gaba-gaba. Acim lia Sander lari langsung Acim angka kaki kaeng la lari lai iko Sander di Sibu pung pintu dapor]

Sander : Usi ee….usi eee….buka pintu nih la.

[Pas Ola buka pintu]

Sander : Sibu pukul se?????

[Ola tabingung-bingung, mar Ola balong bilang sa kata lai, Acim su torana Sander pung pohong tangang]

Acim : Ose nih Alexander toh…..ana su tar tau mau bilang apa lai par ose.
Sander : Tadi abang bataria dia laki pukul dia sampe pagi toh????
Acim : Tagal itu otak tuh jang pono deng pikirang politik. Pi sunsang se kapala di aer masing sana biar akang kosong sadiki la udara Har’ Kajadiang nih kas ponoh akang ulang. Ana maksud itu Sibu pukul talor deng tapong par Ola bakar bluder sageru…
Sander : Tuandalar……beta su kira apa lai???
Acim : Tagal itu pikirang tuh kas jao akang dari baku pukul, baku marah deng akang konflik bodoh tuh

[Dong tiga tatawa tagal Sander pung parsir par pagi hari. Sibu kaluar par dong tiga]

Sibu : Abang, kas tinggal ana Sander tuh la mari katong dua ka baranda muka. Beta su saleng kopi sa beker deng bluder sageru sa sele basar.
Acim : Itu macang….

[Acim deng Sibu langsung ka baranda. Tar mau ilang muka, Sander iko lai. Sampe di baranda dong tiga su tar potong kukis tuh lai mar manggurebe rabe akang. Dasar barakal, Sander rabe spanggal basar alam paskali]

Acim : Nyong, eso Kajadiang nih e….Ana sanang paskali bisa hidop sama-sama deng ale dong samua.
Sibu : Abang nih macang dar’ dolo katong ada tapisah sa. Dar’ dolo katong birman toh.
Sander : Kajadiang nih abang akang seng pandang Salam ka Sarane. La katong samua sama sa tuh. Nanti Taong Baru Salam, akang par katong yang Sarane lai toh???
Acim : Ana baru pernah dengar ose pung pikirang bagus har’ ini di Sander. Ana tau, itu pasti tagal se su mulai rajing inja pintu gareja.
Sibu : Abang macang tau beta pung konyadu nih sa e....dalang sataong, sabulang sa dia rajing inja pintu gareja, itu kalu Desember
Acim : Iyo mar seng apapa jua……biar ana deng dia macang deng tikus deng kucing, mar katong dua cuma pawela saja tuh
Sander : Katong su pandang abang sama deng katong orang tatua saja toh
Sibu : itu sudah
Acim : Iyo e, mar macang orang bilang ‘sagu saporna tuh ada 1 yang angos’, ha….yang angos tuh Sander nih jua……[dong tatawa la Acim tandang Sander pung pohon kaki]. Ana sanang ale nyong…..katong sumbayang kuat-kuat supaya Kajadiang nih katong samua laeng tambah sayang laeng jua

Sibu : Itu sudah abang e…..

[Bluder tinggal spanggal, dong tiga baku nganga la Sander loko akang kasi par Acim]

Sander : Beta su tau, abang suka bluder sageru yang beta kaka parampuang bakar. Akang macang beta suka Mama Oda pung opor ayang deng katupa pas Taong Baru Salam
[Dong tiga tatawa sama-sama]

Salamat Hari Kajadiang lai Basudara samua!
[Eltom Sibu]