Tobat, Istobat

Oleh. Elifas Tomix Maspaitella

Add caption

Orang suka tanya kalu tobat tuh bagumana? Par mangarti akang tobat tuh seng susah. Mar par hidop tobat tuh susah-susah gampang. Biar bagitu akang pung konci dalang katong pung diri sandiri. Orang seng bisa paksa katong par tobat, mar katong bisa biking sandiri.

Ada ampa tabiat kalu mau tobat.

1. Sapa yang mau tobat dia musti merendahkan diri di Tuhan pung muka. Katong musti bagitu tagal katong nih cuma manusia yang seng luput dari salah. Mar biar bagitu Tuhan tuh Antua panjang sabar sampe mau kas ampong katong dari dosa. Biar salah banya mar Antua seng kasi hukumang yang biking katong binasa.

2. Sapa yang mau tobat dari dia pung salah musti mangaku dia pung salah kamuka. Tar mungkin katong bilang mau tobat mar tar mau mangaku kata katong biking salah apa. Sapa yang mangaku deng jujur, dia pung hati barsih par mau tobat.

3. Kalu su mangaku akang jenis salah tuh, dia musti angka janji, kalu dia seng bale biking salah itu par kadua kali lai. Binatang sa tar pi sonto batu yang sama par kadua kali apalai katong manusia. Orang yang mangaku tar bale ulang salah tuh adalah orang yang batul-batul mau tobat. Kalu bale tasonto ulang lai itu ISTOBAT.

4. Kalu tiga yang di atas su jadi deng bae, orang yang tobat tuh dia pung pengenalan par Tuhan tambah bagus deng dalam. Dia hidop deng tau apa yang Tuhan mau.

Jang Mengeluh

‘Binatang-binatang samua mengeluh, tagal su seng ada rumpu ijo lai par dong making; kambing deng domba lai takajo stengah mati par tau su tar ada rumpu ijo’ (Yoel  1:18)

Katong samua pasti tau bagumana rasa susah. Apalai deng tuntutan hidop su tambah banya, barang-barang di pasar tambah mahal, balong lai musti lia anana pung skolah. Mar, tar usah sampe mengeluh, apalai tagal mengeluh lalu baku marah dalang rumah. Di tampa karja jua karja seng tenang. Tidor jua su seng sono.  Katong pung ayat Alkitab di atas tuh memang biking katong bisa takajo sadiki. Apalai kambing sa ekor di foto tuh. Itu kambing di Bandara Kisar. Akang makang rumpu karing, tagal di sana panas. Mar lia, akang gamu. Artinya biar susah, mar asal karja deng sanang, deng sukacita, Tete Manis seng sambunyi berkat dar’ katong hidop. Asal jua tau lai kalu berkat tuh musti bawa pulang lalu sumbayang bilang dangke par Tete Manis, maka tar ada yang susah di hidop nih. Jang mengeluh, mar ucap syukur lalu ator berkat bae-bae.(*)

Indahnya Beribadah

Bahan Bacaan : 1 Tawarikh 28:9 
Oleh. Elifas Tomix Maspaitella  

Dan ale, Salomo, ale musti kanal Allah yang dolo ale pung papa sembah,lalu musti beribadah par Antua deng hati tulus, ikhlas deng rela, abis skang Antua tuh tau ale pung hati yang paling dalang,Antua mangarti ale pung niat samua. Kalu ale cari Antua, Antua seng lari dari ale, tapi kalu ale bale blakang kas tinggal Antua, itu par Antua bale blakang dari ale sudah tuh (I Taw.28:9)

Samua orang yang mangaku parcaya par Tuhan, dia musti tunju akang dalang kalakuang hidop hari-hari. Seng bisa di mulu bilang parcaya, padahal akang seng bawujud dalang kalakuang tiap hari. Satu hal yang bisa jadi bukti katong nih orang parcaya yaitu deng jalang ibadah. Alkitab yang katong baca tadi tunju ibadah tuh pung bagus akang ada di hal-hal macang yang katong mau bilang satu abis satu nih:

Kanal Tuhan. Samua orang yang datang ibadah tuh dia kanal Tuhan.

Coba katong lia sa. Katong tau lonceng gareja tuh Tuhan pung suara yang panggel katong datang par ibadah. Jadi kalu sapa yang dengar lonceng gareja lalu siap-siap par pi ibadah, itu artinya dia kanal Tuhan batul-batul sudah tuh. Kalu ada yang bilang dia kanal Tuhan mar dengar lonceng lalu pura-pura karja banya lalu tar pi ibadah, itu artinya dia batul kanal Tuhan mar kanal deng hati yang seng tulus, seng ikhlas deng seng rela. Katong musti usaha supaya tabiat macang bagitu tuh akang baubah jua. Su seng jamang lai par bilang ‘nanti kong’ par Tuhan pung suara. Antua seng pastiu panggel, lalu Antua jua seng pastiu par tunggu katong datang.

Cari Tuhan. orang parcaya tuh dong cari Tuhan seng jao.

Tuhan tuh dekat deng dong, lalu sabang waktu dong baku dapa Antua. Ada orang yang bilang bagini, seng pi ibadah jua dia bisa baku dapa deng Tuhan di tampa karja, tampa barmaeng, deng sagala tampa. Batul! Tuhan tuh Antua ada di sagala tampa deng sagala waktu. Mar jang lupa, kalu katong hati karas par dengar Antua suara, Antua ada tuh jua, mar katong biking macang Antua seng ada lalu seng lia katong. Mar kalu katong dengar Antua suara lalu datang cari Antua di tampa yang Antua su pilih, Antua suka baku dapa deng katong samua.

Dekat deng Tuhan. Orang dengar Tuhan pung suara lalu datang cari Antua, dong hidop dekat deng Tuhan.


Katong pung ayat Alkitab tadi akang bilang bagini: ‘kalu ale cari Antua, Atnau seng lari dari ale, tapi kalu ale bale blakang kas tinggal Antua, itu par Antua bale blakang dari ale sudah tuh’. Akang pung maksud bagini: kalu katong dekat deng Antua, Antua dekat lai. Tagal dekat Antua mangarti katong pung isi hati yang paleng dalang. Bayangkan saja, kalu Antua mangarti katong macang bagitu, minta apa saja pasti Antua kasih. Lalu katong seng hidop deng susah hati. Abis skang katong mangarti Antua, Antua jua mangarti katong. Jadi ibadah tuh akang pung bagus di situ. Katong kanal Tuhan, katong baku dapa deng Antua, lalu katong hidop dekat deng Antua. (*)

Iman Zakheus

Bahan Bacaan: Lukas 19:1-10 Oleh. 

Elifas Tomix Maspaitella


Katong samua su tau carita Zakheus. Dia pende. Badannya gamu. Poro sadiki bico. Mar dia kaya. Dia kas pinjang kepeng bukang par biking orang sanang, mar orang tambah susah. Seng susah bagumana, dia kasi pinjang lalu akang pung bunga tinggi labe dari haros. Kalu orang tar mampu bayar, dia sita orang pung sagala barang dalang rumah. Konci rekeng bagini, orang yang su kasiang tuh dong bale tambah kasiang. Manusia macang Zakheus tuh tar salamat jua! Hahahahahaaha……….


Mar Tuhan Yesus nih Antua laeng dari yang laeng. Satu kali Antua pi Yerikho, di akang ana Zakheus nih pung kota. Pas dia orang Yerikho. Dia lia orang banya-banya basoso di jalang, langsung dia iko rame lai par cari tau ini ada apa kong orang basoso. Tau-tau bagini Tuhan Yesus datang. Seng salah lai, ana nih dia su pernah dengar orang carita-carita tentang Tuhan Yesus. Tagal itu dia iko basoso lai. Mar tagal pende, dia tar dapa lia. Dasar tukang kredit, dia akal panjang paskali. Hahahaha….

Dia lia bagini ada pohong Ara di pinggir jalang. Seng tunggu lama lai deng laki-laki lari nai akang pohong ara tuh jua mo. Konci rekeng, dia bisa lia Tuhan Yesus. Mar batul lai, tagal nai di akang pohong tuh, akhirnya Yesus lai dapa lia dia lalu suruh dia turung tagal Antua mau pi dia rumah. Pas tau bagitu, dia kaget stengah mati. ‘Bapa e, beta orang bardosa bagini baru Antua nih mau pi beta rumah lai. Skang orang laeng bilang apa?’ Kira-kira Zakheus pung dalang hati bilang bagitu sudah. Hahahaa….

Mar batul jua toh, Tuhan Yesus pi Zakheus rumah, lalu katong samua lia. Dia janji di Antua pung muka langsung dia angka tobat. Tar kas pinjang kepeng deng bunga tinggi lai. Baru tau ka seng? Dia kas pulang samua yang dia ambel dari orang-orang kasiang tuh. Dia lia dia pung catatan, lalu dia kas bale orang pung kepeng-kepeng samua. Dia biking pesta par undang samua orang datang makang. Ini ana dia luar biasa.

Baku dapa sakali deng Tuhan Yesus sa dia tobat tiga ratus anam puluh derajat. Dari situ katong bisa blajar. Orang pende sama Zakheus nih pung kemauang karas [niat] biar cuma par lia Tuhan Yesus. Nah, iman tuh akang muncul dari niat. Niat itu yang biking katong usaha, biar apa pele lai. Lia Zakheus sa, dia pende, mar dia usaha sampe nekat nai pohong Ara. Kalu katong su usaha, pasti Tuhan lia dan Tuhan pasti kasi jawaban atas katong pung usaha. Soalnya samua usaha itu akang seng parcuma.

 Orang berusaha tuh selalu ada harapan. Jadi Niat + Usaha + Pengharapan = Iman. Itu yang Zakheus tunju. Seng sampe situ sa. Dia pung iman su baru. Akang biking dia kasi pulang samua yang dia tagih dari orang-orang. Itu berarti Niat + Usaha + Pengharapan = Iman = Hidup Baru. [*]