Friday, July 13, 2012

Jang Mengeluh


‘Binatang-binatang samua mengeluh, tagal su seng ada rumpu ijo lai par dong making; kambing deng domba lai takajo stengah mati par tau su tar ada rumpu ijo’ (Yoel  1:18)

Katong samua pasti tau bagumana rasa susah. Apalai deng tuntutan hidop su tambah banya, barang-barang di pasar tambah mahal, balong lai musti lia anana pung skolah. Mar, tar usah sampe mengeluh, apalai tagal mengeluh lalu baku marah dalang rumah. Di tampa karja jua karja seng tenang. Tidor jua su seng sono.  Katong pung ayat Alkitab di atas tuh memang biking katong bisa takajo sadiki. Apalai kambing sa ekor di foto tuh. Itu kambing di Bandara Kisar. Akang makang rumpu karing, tagal di sana panas. Mar lia, akang gamu. Artinya biar susah, mar asal karja deng sanang, deng sukacita, Tete Manis seng sambunyi berkat dar’ katong hidop. Asal jua tau lai kalu berkat tuh musti bawa pulang lalu sumbayang bilang dangke par Tete Manis, maka tar ada yang susah di hidop nih. Jang mengeluh, mar ucap syukur lalu ator berkat bae-bae.(*)

2 comments:

John Dirk Parera said...

batul Bapen..., banya dari katong pung bapa-bapa ni seng bisa ator akang berkat tu bae-bae... jang kong akang pi cari jalang ka tampa laeng, apalai kong ada yang minta bagiang di 'karaoke' lebe bae pi 'ka kerko' jua eee.... hahahaeeeee....

Gratia said...

Orang2 Kristen sakarang nih lebe suka hitong keluhan dar pada berkat, bapa,e..
Ada uang, bilang seng ada..
Ada kuat, bilang seng kuat..
Ada mampu, bilang seng mampu..
Akhirnya, berkat nih akang masuk, blom lia rupa lai baru dengar suara sa, berkat su cigi gas pigi..
Abis berkat su rasa sasak dlm rumah, abis skang keluhan su dudu d kursi2, sampe dlm kamar kamar dg kamar mandi jua keluhan fooollll...
abis kalo katong lebe rekeng berkat cuma waktu katong dapa makang, dapa kasih barang, dapa kepeng (berkat materi)..
Sampe katong lupa berkat2 laeng, yg justru jaoh labe penting dar samua berkat yg ada.. Kayak, nafas hidup stp pagi, kebersamaan yg indah dlm keluarga (org tua, ana, cucu), tetangga2 yg mau datang buka gigi sadiki dg katong, dsb..

Su bagitu, katong nih kadang lucu lai,e.. Mau biking diri sama dg Tuhan atau seng parcaya Tuhan..
Stiap saat katong berdoa, syukur dg keluhan berbanding 1:10..
Su bagitu, su bilang pasrah foll par Tuhan ttg beban hidup..
He, masih dengar keluhan spanjang hari lai.. Tuhan blg, aow, kalo bagini, ale pikol sandiri jua.. Lah, ale sj seng parcaya b par tangani akang ni..

*sekedar untuk perenungan bersama saja, bu Eli*

Tabea Upu Ina Upu Ama

This is my personal blog which contain my ideas. I welcome you to read and give the critical comments. And let us going to progressive discourse!